أمنياتى فى العام الجديد

أتمنى في العام الجديد ان الاحوال تنصلح فى بلدى وأعيش واشوف وعود الحكومه تتحقق على ارض الواقع ،والمواطن المصرى الغلبان يعيش حياه آدميه والاسعار ترخص والاجور تزيد ، والناس تشرب ميه نظيفه ،والعمارات ما تقعشى، والشباب ما يطفشوش ويغرقوا ، والقطارات ما تدخلشى فى بعضها ،والعبارات والمعديات ما تغرقشى بالناس ،ونقضى على الاهمال بقى ،والشرطه تأدى دورها فى حفظ الامن والاستقرار وتبطل تعذيب فى خلق الله، والحكومه تتقى الله فينا ، وترجع تانى الشرطه فى خدمة الشعب 0
ونفسى الناس اللى بتأتى بفتاوى غريبه وعجيبه زى جواز التدخين فى نهار رمضان لانه لا يفسد الصوم ، وارضاع الكبير، وفتاوى حرق القش واعتبار شبابنا اللى بيموتوا غرقاً لمحاولتهم الهرب بحرا بحثا عن الرزق اللى مش لاقينوا هنا انهم مش شهداء وانهم طماعين، واطالب بتوحيد الافتاء فى العالم الاسلامى وعقد مؤتمر سنوى يناقش القضايا المعاصره اولا بأول والافتاء فيها يبقى ملزماً للجميع واطالب بتأهيل خطباء المساجد للدعوة الاسلاميه وكفايانا خزعبلات وقصص وهميه عن الجن والعفاريت فى خطب الجمعة وندخل الحمام برجلنا اليمين ولا الشمال وان نستفتى قلوبنا اولاً الذى قالها الرسول منذ اكثر من 14 قرناً وكأنه كان عارف باللى حيحصل لامة الاسلام من بعده ان يكون عقلك صافياً عادلاً وعقلك مستنيرا0
ونفسى فى العام الجديد ان برامجنا الفضائيه تتسم بالعوده مره اخرى الى الحياء بأعتباره شعبة من الايمان و ان البرامج اللى بتتسم بالحريه وعدم الرقابه يتداول فيها المذيع والمذيعه والضيف الالفاظ القبيحه والايحاءات التى تخدش حياء كل من يشاهدها تحترم عقولنا شوية

ونفسى لما الريس اعزه الله يعزم اى حد من زعماء البلاد الافاضل ما يقفلش علينا الدنيا كده ويوقف مصالح العباد مش علشان بسلامته الاخ ساركوزى والمزه بتاعته يتفسحوا ويهيصوا ويروحوا يشوفوا الهرم يوقفوا شارع الهرم طول اليوم حرام عليكم ويا ريت على كده وبس دا زيارته احزنت واتعست واغضبت كل سكان حى الهرم لما موكب بسلامته كان قادم وانطلقت سياره مسرعة بسرعه مجنونه فى الجانب الفاضى من الشارع ودهست صبى كان حظه الاسود انه بيعدى الشارع فى اليوم دا طوحته فى الهوا وطبعاً مات علشان ما فيش اى سياره ممكن تمشى الا بعد ما الموكب يعدى واضطر الناس انهم يسيروا به على اقدامهم لمستشفى الهرم اللى على بعد امتار من الحادث ، مسئولية مين دى ودمه فى رقبة مين الصبى دا وليه احنا كده مالناش تمن ولا لازمه عند الناس دى ودمنا مهدور؟؟
ونفسى فى السنه الجديده اوجه رساله للاخوه العرب والخليجين والسعودين واقولهم حرام عليكم حلوا عننا شويه خنقتونا انا حاسه بالغربه داخل بلدى ما فيش مول ولا سينما ولا مطعم ولا شوارع الا تلاقيها مكتظه بيهم وكأنها بلد ابوهم واحنا اللى قعدين عندهم وتلاقى يا عينى المصرين واقفين يتفرجوا بحسره على الاسعار وقلة حيلتهم وانهم مش قادرين يشتروا حاجه لولادهم ودول شغالين شراء بجنون ربنا يهدكم.
واخيراً بقى نفسى اشوف فى مصر ستات فله كده لامعين فى السياسه مصريات بجد مش سيدات اعمال واقتصاد نفسى الاقى مرأه مصريه اختيرت بأنها افضل شخصيه سياسيه لعام 2008 نلاقى كده عناصر زى عائشه روز – نائبة سكرتير عام الامم المتحده، وانجيلا ميركل – المستشاره الالمانيه رئيسة الاتحاد الاوربى ، او نانسى بيلوسى- رئيسة مجلس النواب الامريكى ، ولا رشيده داتى – وزيرة العدل الفرنسيه ، ولا كريستينا كيرشنر رئيسة الارجنتين 0
او على المستوى الاعلامى ويصبح عندنا واحده زى اوبرا وينفرى مقدمة برنامج
Oprah Winfrey show
احتلت اوبرا المرتبة التاسعة في أول 20 شخصية من النساء الاكثر نفوذا على صعيد وسائل الاعلام والسلطة الاقتصادية. كما احتلت المركز الثاني حسب تصنيف مجلة فوربس لعام 2005 في قائمة أكثر الشخصيات تأثيرا في العالم الذي ضم 100 شخصية وصعدت وينفري لتحل محل ميل جيبسون من حيث الثروة فقد بلغ دخلها السنوي225

مليون دولاراستضافت شخصيات سياسية اجتماعية مثل بيل كلينتون،هيلارى كلينتون كونداليزا رايس. عرف عنها ارادتها القوية وانشأت اكاديمية للفتيات الفقيرات فى جنوب افريقيا وتبرعت بمبلغ 40 مليون دولار من ثروتها لإنشاء اكاديمية اعداد القيادات تضم 150 فتاة يرتفع عددهن الى 450 فتاة خلال 4 سنوات . تأمل ان يكن طليعة الطبيبات والمهندسات وعالمات وقد حرصت على اختيارهن بنفسها
حقاً افتخر بها واحييها وأتمنى ان أرى فى مصر إمرأه بحق مثلها سواء على المستوى الاعلامى او السياسى او الادبى وان الاعلاميات المصريات يرتقوا بالحوار كما اتسمت اوبرا مش يأجروا بنات ليل ويقولوا ان مصر بناتها بقت كده اصل هى المشرحه ناقصه قتله

اما على المستوى الشخصى برضه اوله اتمنى السلام يعم على العالم اجمع وان اشفى من نزلة البرد اللى عندى والستر والصحه وكل عام ومصر بخير دائماً وابداً