طبعاً انا مش هعلق على اى صوره انا نشرتها فى البوست دا لان اكيد الصور بدون تعليق بتعبر على اللى فيها. انا بس احب اعلق على صوره واحده بس وهى صورة انجيلينا جولى وهى مع ستات باكستانيات اثناء زيارتها ليهم بعد حدوث زلزال كبير تقريبا دمر معظم المدن عندهم، وانجيلينا جولى دى ممثله امريكيه اكيد كتير منكم عارفينها وشافوا افلامها ومعجبين بيها كممثله جامده وفيه على فكره كتير من الممثلات والممثلين الاجانب بيعملوا الحاجات دى، وناس كتير بتقول هما بيعملوا دعايه لنفسهم علشان الشهره وكده لكن شهرة ايه لوحده اساساً نجمه كبيره زيها لكن انا بقى معجبه بيها اعجاب من نوع مختلف وهى بالذات، وهو اعجابى بإنسانيتها واعمالها الخيريه اللى تحسب ليها بالفعل بالرغم من ان كتير منكم اكيد هيقولوا معقوله بتعجبى بيها وهى امريكيه وهى مش عربيه وكلام كتير من النوع دا برد اقول وفيها ايه اذا كانت الست دى بجد بميت راجل معلشى يعنى عندنا . الست دى من كثرة اعمال الخير اللى بتعملها اختاروها سفيرة النوايا الحسنة للمفوضية السامية للأمم المتحدة لشئون اللاجئين ودايماً نلاقيها بتساعد الاطفال اللاجئين وكل الفقراء فى العالم وهى الوحيده اللى خصصت نص ثروتها لمساعدة كل المحتاجين فى العالم وجت هنا مصر فى اواخر العام الماضى واتبرعت للمؤسسات الخدميه المحليه ولاطفال السودان اللاجئين هنا فى مصربمبالغ من المال فى بقى حد هنا عندنا بيفكر فى الفقراء بلاش اقول اللى فى العالم علشان ما حدش يقول انا زى القرع بمد لبره قصدى اللى فى مصر من الفقراء والمهمشين واطفال الشوارع والعشوائيات احنا عندنا رجال اعمال وبشوات مش لاقيه تصرف فلوسها فى ايه عمرنا شوفنا حد منهم اتبرع مثلا لاى مشروع خدمى صحى مجتمعى خيرى لمساعدة الناس الغلابه وحتى المستشفى بتاعت الاطفال قعدنا نبنى فيها 5 سنين لغاية اما الاطفال اصلا ماتوا من المرض واحنا قاعدين نشحت عليهم ونستعطف الناس فى الوقت ان لو كان كام واحد من البهوات دول اتبرع ولو بجزء بسيط من اللى عنده كنا بنينا 3 مستشفيات بأجهزتهم بأطبائهم وعيانينهم كمان لكن فين الرحمه وفين التعاطف وفين المسلمين اللى بيقولوا على انجيلينا جولى وحشه وممثله وربنا مش هيقبل منها اعمالها دى طيب انتوا يا
مسلمين ياللى معاكوا فلوس عملتوا ايه للفقراء؟؟؟
وبقول حسبى الله ونعم الوكيل لكل من يشعل الفتن ويدعوا للحرب ويعتدى ويغتصب فى غير ارضه وماله وكل من تسول له نفسه ان يستعبد الناس ويعذبهم ويستحل اعراضهم وانسانيتهم وحسبى الله ونعم الوكيل فى كل الظلمه والمتجبرين على وجه الارض اللهم ارحمنا واعنا على ذكرك وشكرك وحسن عبادتك وانصرنا على القوم الكافرين ...آمين آمين
13 comments:
فعلا متناقضات كتيره منها اللى يحزن ومنها اللى يضحك
لكن بتفق معاكي انه عالم مليء بالتناقضات
بالنسبه لانجلينا جولي فياريت يكون عند اصحاب البلايين المصريين ربع حسها الانساني موش اقصد بالفلوس وبس لا المجهود والتعب وواحده زي دي نجمة نجوم هوليود بتقعد وسط فقرا زي اللى فى الصوره علشان تدعم مباديء
نسيت اقولك تسلم ايدك ويسلم مجهودك
تحياتي
حنين
السلام عليكم
أولا فالتسمحي لي أن أشكرك جزيل الشكر علي تشريفك لي في مدونتي المتواضعه وأرجو حقا أن تكون هذه بدايه للتواصل الفكري بينناوسوف يكون هذا مما أسعد به بالفعل لأنني قرأت بعض مواضيعك المطروحه في هذه المدونه الرائعه وأعجبت كثيرا بأرائك القيمه كما أشكرك جزيل الشكر علي مجاملتك الرقيقه لي ...ألف شكر لكي
ثانيا أحب أن أقول أنه بالفعل كما ذكرتي في عنوان هذه البوست انه عالم ملئ بالمتناقضات ، عجيب ان تجدي بعض الأفراد من المشاهير والأثرياء في العالم الغربي يتبرعون بجل مالهم لفقرائنا في عالمنا العربي والأسلامي ولا تجدي مثل هذا التصرف من أبناء جلدتنا الا طبعا من رحم ربي ، أتذكر الأن حديث الرسول الأعظم عليه الصلاه والسلام ( من لم يهتم بأمر المسلمين فليس منهم)أتذكر هذا الحديث واتعجب من كميه السفه التي نراها في عالمنا العربي والأسلامي كم من الأموال تنفق في غير ذي نفع كان أولي بها فقرائنا ، لقد وضعتي يدك علي جرح دامي بالفعل ، أعتقد اننا في العالم العربي والأسلامي قادرون علي أن نعول ونكفي فقرائنا فقط لو خلصت النوايا ولو علمنا أننا مسؤلون عن هؤلاء الفقراء مسئوليه أمام الله عز وجل وأمام أنفسنا من حيث الجانب الأنساني نتمني أخيرا أن يتعلم اثريائنا كيف ينفقون أموالهم فيما يستحق أن ينفق
تحياتي لكي حنين علي طرحك لهذا الموضوع المهم وألف تقدير لشخصك الكريم
الصور تعبتني نفسيا بجد
لكن كذلك الحياه تصدقي انا كنت بفكر من يومين فيها ايه لو الغني ادي الفقير بحيث ميكونش فقير
واعد اتعمق في التفكير لقيت ان ربنا اكيد ليه حكمه لوجود تلك المتناقضات
تحياتي
بوست جميل جميل جميل يا أحلى حنين
بجد مجموعة معبرة من الصور
وتعليق هايل منك, ورسالة انسانية عالمية
انجيلينا جولي بتقضي وقت ف افريقيا اكتر من اللي بتقضيه ف امريكا
لدرجة انها ولدت بنتها في ناميبيا
واثناء فترة حملها كانت بتزور اماكن فيها نزاعات واوبئة
وانتي بحسك الجميل وانسانيتك العابرة للقارات قدرتي تختاريها كمثال واضح وصريح يعبر عن تناقض حاد ايضا موجود ف العقل العربي اللي ما يعرفش غير الابيض والاسود
الست دي المفروض ان كل الخير بتعمله دا مالوش لازمة, وانها داخلة جهنم لا محالة
مش مهم بقى عالجت كام مريض ولا اكلت كام جعان ولا ساعدت كام محتاج
واحنا اللي قاعدين نتكلم في ارضاع الكبير والقصة اللي باينة من تحت الحجاب والجوانتي يبقى اسود ولا ألوان طبعا راحين الجنة حدف
خلينا قاعدين.. هو احنا ورانا حاجة؟
النبي عليه الصلاة والسلام قال "خير الناس انفعهم للناس
واحنا لا منا ولا كفاية شرنا
لكن الصراحة مش كل رجال الاعمال من النوعية اللي انتي وصفتيها
فيه منهم ناس بتعمل خير كتير لكن مش بتعلن عنه وبجد بتحرص على ان دا يفضل لوجه الله
بس كتير برضه للأسف بيصرفوا ف الاعلانات ملايين ويجوا على كام ألف تبرع يعملوا مشكلة ويبقوا عايزين يعرفوا المبلغ اللي هيدفعوه هيتخصم من الضرايب ولا لأ
برضه ارجع واقولك عندنا ف مصر مشكلة ف العمل التطوعي والخيري
لانه بيتعمل بنظام الصدقة, لكن مفيش خطط ومشاريع بتتعمل بطريقة صح علشان تحل مشكلة
يعني مثلا نظام المدارس الأهلية مش موجود عندنا خالص مع اننا محتاجينه جدا
انما تلاقي جامع عامل فصول تقوية بمبالغ رمزية او بالمجان في اضيق الحدود
لكن ان مجموعة يتبرعوا بمبلغ ويبنوا مدرسة ويحطوا وديعة ف البنك تصرف عليها, دا مش موجود عندنا خالص
الغني عندنا بيعمل خير وهو مرشح نفسه ف مجلس الشعب
غير كدا ولا تلاقيه ولا تسمعيله حس
موضوع اطفال الشوارع مثلا عمال يتفاقم
وندوات ومؤتمرات علشان يبحثوا موضوع اطفال الشوارع وبعدين كل حاجة تنام والمشكلة زي ما هي
طب نعمل ايه يا حنين؟ كل حاجة ماشية عندنا بالبركة. مفيش تخطيط لأي حاجة
فوضى وخلاص
حتى فعل الخير بقى فوضى
خالص تحياتي يا قمر
عزيزى/ حلم مصر
اسعدنى وجودك وتعليقك القيم مره اخرى فى مدونتى وسعيده ان الفكره عجبتك واتفق معك فى امنيتك فى ان يمتلك اثرياء مصر والعالم العربى حث هذه المرأه الانسانه الرائعه
دمت بكل ود مع خالص تقديرى
mado80
وعليكم السلام ورحمة الله وبركاته
مرحباً بك اخى الكريم وبجد نورتنى واسعدتنى بزيارتك العطره الى مدونتى الصغيره ويشرفتى بالقطع التواصل مع عقل وفكر شخصكم الكريم ولا شكر على واجب سيدى فهذا ما تستحقه من مديح ويزيد كما اشكرك على مشاركتك فى التعليق على الموضوع ورسالتك الجليله التى وجهتها معى الى العالم العربى والاسلامى لكى ننظر بعين العطف والرحمه ولو مره واحده فى العمر الى كل الفقراء فهل من مجيب وهل من مغيث طيب هل من قارىء ... ولا حياة لمن تنادى
انت شرفتنى واتمنى دوام التواصل والتفاعل
خالص تحياتى واحترامى
coca
ازيك يا قمر والله انا ما كنتش اقصد اضايقك او اتعبك نفسيا يا كوكا يا ريت الناس كلها كده زيك عندها نفس الاحساس والقلب الطيب الرقيق كنا وفرنا كلام كتير قوى بس بجد يا كوكا احنا لازم نوضح الصوره ونعرضها لعلنا نجد من يستجيب ويعمل حاجه للناس دى مش نقف نتفرج وخلاص لازم نتكلم دا لو كانوا البعده الاغنيا عميان فى نظرهم كانوا زمانهم فتحوا
نورتينى يا كوكا وبتسعدنى زيارتك جداً
الغاليه/ فانتازيا
ازيك يا فانتا وحشتنى تعليقاتك اللوذعية حقيقى كلامك كله فى الصميم لكن تقولى لمين دا احنا مش عندنا نقص عندنا انعدام فى جوانب كتيره المفروض يقوم بيها مؤسسات المجتمع المدنى لكن بجد والشهاده لله فى مجموعة طلبه وشباب الله يبارك فيهم بجد وهما دول فعلا خيرة شباب البلد دى بيعملوا العمل التطوعى لوجه الله بقصد الخير والله انا بشوفهم بعينى وبتابعهم بنفسى وهما شباب جمعية رساله الخيريه والراجل صلا صاحب الجمعيه دى وفروعها ابتداها بتبرعه بقطعة ارض كان وارثها وبعدين لما لقى الموضوع كبر واشتهر قعد يشترى فى اراضى ويبنيها كلها للخير مستوصفات طبيه ومراكز علاج وتحاليل واشاعه ودار رعايه للايتام ومساعدة ذوى الاحتياجات الخاصه واخيرأ مراكز للمكفوفين تخيلى يا فانتا عدد المتطوعين فى الجمعيه دى كام شاب وفتاه حوالى 22000 ومرشحه انها تدخل فى موسوعة جينيس للارقام القياسيه العالميه لاكبر عدد متطوعين فى العالم بجد شىء يفرح ويبعث الامل مره تانيه فى الواحد لما يشوف شباب زى الورد كده بيحب الخير ويساعد بدون اى مقابل ويشجع اهله وجيرانه واصحابه انهم يعملوا زيهم ودا فعلا اللى حصل ابتدت جمعيات كتير تقلد رساله وفى والله امل مصر لسه ولادها الطيبين بخير وعندهم استعداد انهم يعملوا اى حاجه فى سبيل الخير وفى غيرها برضه زى قافلة الاستاذ/ عمرو خالد والحاجه ياسمين الخيام ومعظم الفنانات المعتزلات برضه الواحد لازم يشيد بأعمالهم لكن على الوجه الاخر لمصر تلاقى ناس محبطه ولما تسأليهم لو كسبت مليون دولار تعمل بيهم ايه يقولك هشترى كذا وكذا والف العالم وعمرك ما تلاقيه يقول اتبرع للناس الغلابه بشىء صحيح منتهى التناقض نسأل الله نجاح الامل عند انقضاء الاجل وان يجعلنا من الذين إذا اعطاهم الله شكروا وإذا ابتلوا صبروا ويجعلنا من الذين إذا احسنوا إزدادوا وإذا اساءوا إستغفروا.
نورتينى يا احلى فانتا
حنين
تحياتي و خالص تقديري
الصور ينفطر لها كل قلب سليم .
أيضا أنا اشاركك الإعجاب بهذه الممثلة و أعمالها الانسانية....وأيضا اوبرا وينفري...المذيعة المشهورة التي تبني مدارس في جنوب افريقيا لتعليم السود الفقراء.
أما اثرياء المسلمين....فلو أخرج كل منهم زكاة ماله...فقط زكاة ماله...لكان الحال غير الحال...
لكن البعض يكتنز المال...و البعض يستخدم الثروة بسفه...
أيضا أحب ان أوضح أن بعض الفنانين المصرين مثل محمد ثروت و محمد فؤاد...لهما اعمالا خيرية...و ياريت الاخرين يقتدون بهم....
تحياتي و تقديري و اشكرك علي البوست عله يجد رد فعل في قلب كل منا...فالقليل الي القليل كثير بإذن الله.
خالص تحياتي
الربان
اهلا وسهلا بيك اسعدتنى زيارتك بجد ومعلشى لو كانت الصور قاسيه شويه وبتتعب نفسياً لكن هنعمل ايه هى الحقيقه كده دايماً بتكون قاسيه
وبالنسبه لموضوع اعمال الخير اكيد طبعا فيه كتير من الفنانين والمشاهير ورجال الاعمال بس بيكون مش بالصوره اللى المفروض يكون بيها وبالقدر الكافى زى ما وضحت الاخت فانتازيا انه مفيش خطط ومشاريع بتتعمل بطريقة صح علشان تحل مشكل وان رجال الاعمال دول بيصرفوا فى الاعلانات ملايين ويجوا على كام ألف تبرع يعملوا مشكلة ويبقوا عايزين يعرفوا المبلغ اللي هيدفعوه هيتخصم من الضرايب ولا لأ وكتير طبعا من الحاجات اللى بالشكل دا ونفسى فعلا فى مصر تزداد ثقافة العمل التطوعى بشكل اوسع واشمل ودا يكون حتى فى المدارس والجامعات والمعاهد لان الشباب بدال ما يقعد فاضى مثلا فى الاجازات الصيفيه او نص السنه او اتخرج ومش لاقى شغل ويشغل وقته بعمل الخير اكيد هيستفاد خبره ووقته مش هيضيع على الفاضى بل بالعكس دا كمان بياخد ثواب واجر كبير انت نورتنى بجد واشكرك على زيارتك الكريمه وارجو ان تكون بدايه للتواصل وتبادل الاراء فيما بيننا
خالص تحياتى
فعلا عندك حق
بس ما تقدريش تنكري ان فيه برضه خيريين مسلمين وممكن يكونوا بيعملوا برضه من غير ما يعوذوا يتشهروا وفيه بيقولوا ومش هتقدري تنسي الشعراوي لما اتبرع بمليون جنيه للتعليم ولحد دلوقتي ريعهم بيصرف على طلبة العلم والامثلة اللي انتشرت كتير لكن برضه ما تقدريش تنكري ان في وقت فيه الممثلة دي بتاكل وتتبرع في غيرها برضه بيقول ان المسلمين صراصير وغيرهم بيدبح يا حنينة
وكفاية تبني سلبيات المسلمين القليلة اللي لازم تتواجد في ضعاف النفوس
ومقارنتها بايجابيات الغرب اللي برضه قليلة في وسط المدابح اللي عاملينها في بلاد المسلمين وولا ايه يا حنينة
وراكم وهكشفكم
حلو قوى الاسم بس يا ترى هتكشف مين بقى انا منهم ههههه
وبعدين عسل قوى وبتدلعنى وتقولى يا حنينه ميرسى يا سيدى او يا ستى بس انا برضه لو تشوف تعليقاتى تلاقينى ذكرت برضه الجمعيات الاهليه والخيريه اللى فى مصر والمشاهير والفنانين ورجال الاعمال وافتخرت بيهم برضه بس نفسى اشوف الموضوع دا بجد الخاص بالتطوع الخيرى دا منتشر ومعروف وبيتنفذ على ارض الواقع اكتر من كده ... ولا ايه
شرفتنى بس يا ريت المره الجايه اعرف اسمك ايه بيهمنى قوى على فكره
Post a Comment