من احدث وسائل التهليب والتظبيط والتشفيط الى بتخترعها وتتفنن فيها الحكومه عشان تطقهنا فى عيشتنا وعيشة اللى خلفونا هى موضة الفيزا كارد للموظفين عشان يروحوا يقبضوا بيها من ماكنة الصراف الآلى وبرضه مش عارفه هى عايزه مننا ايه تانى او توصلنا لايه بعد ما خدت بجداره لقب اجدع حكومه على مر التاريخ قدرت تقلب شعبها وتشطب على آخر جنيه فى جيبه وبمزاجه ومن غيرلا سحر ولا شعوزه بشغل الجلا جلا وآخر التقاليع آل ايه آل بتقولك فيزا !!! دا يعنى على اساس اننا اصبحنا من دول اوروبا والبلاد المتقدمه وكان ناقص لنا بس هى الفيزا ايوه علشان البرستيج برضه وكده يبقى الموظف من دول ملابسه الداخليه لامؤخذه مقطعه وشرابه مخروم وفى جيبه فيزا منظر برضه يا اخونا ولا ايه .. طيب وفروله الاول علاج ولا وجبه ولا اى بلا ازرق لكن فيزا... اكيد دا طبعاً علشان هى حكومه ذكيه واحنا اللى ولاد كلب اغبيه .. يا تكنولوجياتك يا بلدنا ... طبعاً ما احنا حلينا كل المشاكل وكان ناقص لنا بس هيا الفيزا ... يعنى هما ما فكروش انهم بكده بيعطلوا المصالح اكتر ما هى متعطله لما الموظفين يسيبوا شغلهم ويستأذنوا علشان يروحوا يقبضوا ودا ليه لان مافيش غير ماكينه واحده بس هى اللى مسموح لآلآف الموظفين انهم يقبضوا منها لبنك واحد بس وطبعاً ما ادراك ما تجمعات ستات ورجاله موظفين شرشوحين ولا طوابير الجمعيه بتاعت زمان ايام الدلالات ودى تمسك فى شعر دى وتنتهى بخناقه بالشباشب علشان واحد او واحده ماسك الماكينه وهاتك يا صرف ليه وكل زمايله اللى فى ادارته وطبعاً الباقين اللى فى الطابور يقعدوا يشتموه علشان معطلهم وانهم تعبوا من الوقفه والماكنه طبعاً بتهنج وتسخن من كتر الناس وتروح متعطله ونضطر نستنى لما تشتغل وحلنى بقى اوتسحب الفيزا وتطلع الفلوس ولما نيجى نسحبها تروح مرجعاها تانى وكأنها بطلع لنا لسانها ويضطر الراجل الغلبان اللى عنده عيال يضيع عليه مرتب الشهر لغاية الشهر اللى بعده لغاية اما البنك بسلامته يعمل جرد ويتأكد ان الراجل دا ما قبضشى فلوسه بجد .. بالذمه فى مهازل اكتر من كده و الناس يقعدوا يشتموا فى الحكومه وابو اللى اخترع ام الاختراع الفاشل دا ما كنا قاعدين فى مكاتبنا معززين مكرمين والفلوس بتجيلنا لحد عندنا واحنا قاعدين لكن ازاى الحكومه تنام وهى مش مبهدلانه ومعذبانه وذلانه ذل الابل ربنا يذلهم البعده ويشحططهم زى ما هما مبهدلنا كده ... لكن السرقه ام الاختراع برضه ماهى سبوبه واشتغاله ومصلحه سقع للحكومه واخواتها لما الماكنه مش بتقبل اى كسور عشريه يعنى لما يكون واحد مثلا مرتبه 518 تقوم مطلعه ال510 ومحوشاله ال 8 للشهر اللى بعده غصبن عن عين امه علشان البنك يستفاد ويستثمرله فلوسه مش ليه . لأ ليهم هما وشوف بقى كام مليون موظف بيعملوا كام مليار للعالم دى اللى مش مكفيها اللى اخدته وبتخده من كل الاتجاهات وكله بيستفيد والوحيد اللى بيخسر كل حاجه هو الموظف الغلبان محدود الدخل اللى البلد والنظام والحكومه شفطتوا لاخر نقطه فى دمه .... ولا عزاء للسيدات .... ودمتم
