عواد باع ارضه يا ولاد

انتوا فاكرين يا جماعه مشروع توشكى اللى هو مشروع تنمية جنوب الوادى فى الصحراء الغربيه والصحرا دى فيها مجموعه من المنخفضات على خط موازى لنهر النيل ويبعد عنه من حوالى 50 - 100 كم ومنخفض جنوب الوادى دا امتداد طبيعى لمنخفض الواحات الخارجه وبيمتد من الجنوب حتى وديان ومنخفضات توشكى جنوب اسوان بحوالى 250 كم وتبلغ مساحة منخفض جنوب الوادى دا حوالى 8 مليون فدان وفى الغرب منه درب الاربعين اللى بيوصل السودان بمصر عبر الواحات الخارجه ... معايا كده - جنوب الوادى دا يا حضرات يحتوى على ثروات طبيعية فى باطن الأرض بمثابة كنز فعلا لا يجب إهماله او التفريط فيه بالاضافه الى ان وقوع المشروع دا بالذات فى مناطق شاسعة من جنوب وغرب جمهورية مصر العربية يمثل دعما لأهداف التنمية الإستراتيجية موضوع توشكى دا بدأ من زمان قوى يعنى مش الرئيس حسنى مبارك هو اللى اخترعه وفكر فيه لا طبعاً دا فكرته بدأت من الخمسينات من القرن الماضى لما أنشئت الهيئة العامة لتعمير الصحارى بهدف إستصلاح الصحارى المصرية واللى كانت شبة معزولة بسبب حظر الدخول إليها والخروج منها دون تصريح خاص .وبدأت بالفعل من ساعتها بتصنيف التربة ثم البدء فى تنفيذ المشروعات التجريبية فى إستصلاح الأراضى و ظهرت فكرة تنمية الأراضى حول منخفض توشكى مواكبة لفكرة إنشاء السد العالى باعتبار أنة سوف يتيح إمكانيات لتحسين إدارة المياه وتوفير المناسيب والتصرفات اللازمة لها مباشرة من بحيرة السد العالى لبحيرة ناصر .. وبدأ منذ ذلك الحين وضع عدة مقترحات فيما يختص بطبيعة البنية الاساسيه والمواقع والمساحات المقترحة للتنمية فى المنطقة دى و اللى اتبنى المشروع دا واخده على عاتقه من وهو لسه وليد وفكره على الورق هو واحد من اذكى الوزراء اللى مسكوا وزارة الرى فى تاريخها كله من ساعة ما انشأت وهو عبد الهادى راضى – الراجل دا بقى عبقرى وللاسف مفيش حد فاكره ولا بينسب له كل اللى عمله علشان يتحقق المشروع دا على ارض الواقع كان حافظ عن ظهر قلب كل منابع ومصبات وموارد النيل والمنخفضات ودرس الموضوع حته حته كانت فكرة مشروع توشكى دا ببساطه كده وبدون تعقيد من الاساس عباره عن ايه ان احنا علشان نزرع كل المساحات الشاسعه دى فى الصحراء محتاجين طبعاً لموارد مياه مهوله وطبعاً حصتنا من مياه النيل محدوده وبنسب لاننا بنتشارك فيه مع دول تانيه اللى بتصب وبتاخد من مية النيل يعنى ما ينفعشى ناخد اكتر من النسبه المخصصه لينا للزراعه فكان الحل ان المنطقه دى مليانه مياه جوفيه بالهبل يعنى لو جبنا حفارات تحفر آبار على عمق الف متر فى الارض هنجيب ميه كتير جداً وتفيض وتزرعلنا محاصيل تكفينا وتفيض وتتصدر كمان الى ما شاء الله وما تخلصشى يعنى خير مالوش آخر وعلشان الهدف من عمل المشروع دا هو زيادة الاستثمارات فى مصر وأن موضوع الحفارات دا يتكلف حوالى 700 الف جنيه واكتر لكل بير وحفار على الاقل واحنا محتاجين آبار كتيره فبدأت الحكومه تبيع الاراضى دى لمستثمرين عرب سعودين على قطريين على كويته على إمارتيين وبالفعل ابتدوا يشتروا فى اراضى المشروع وطبعاً ثمة مسئولين بلدنا لما يشوفوا فلوس العرب يتسعروا عليها ويبدأ سيناريو الفساد والرشاوى وتفشى الفوضى فلاقوا العرب انهم بيضحك عليهم وان الموضوع مش جايب همه وان فلوسهم بتروح كلها على الحفر وتوفير الميه فطبعاً ريسنا عمل ترعة السلام اللى جنب السد العالى علشان تخدم المشروع والناس اللى بتحفر الابار بتقعد كل سنه تتذل علشان يرتفع المنسوب لمقدار معين علشان يرووا الارض حصل ايه بقى ان الاستاذ الفاضل وزير الماليه السابق محى الدين الغريب ابتدى بقى يستغل موقعه بما انه المسئول عن تمويل المشروع انه يتساهل ويفتح درج مكتبه للعرب الافاضل المريشين وياخد نص النسبه بس اللى ممكن هما يصرفوها لو حفروا ابار وبتاع قام بسلامته اشترى الحفارين بتوع توشكى قبل اوانهم بأربع سنين وخلصلهم موضوع فتح ترعة جنب السد يرووا بيها اراضيهم والموضوع يبقى ميت فل واربعتاشر وطبعا المشروعات اللى خاصه بينا احنا المصرين اتوقفت بسبب السرقه العلنى وعدم وجود ميزانيه تسمح وابتدى يهلب الباشا ويبيع للعرب لا ومش كده وبس دا مطار ابو سمبل دا عملوه اساسا علشان المحاصيل الزراعيه اللى بتتزرع فى توشكى دى من اجود خيرات ارض مصر الطيبه وش القفص يعنى تسافر اول بأول على طيارات خاصه لكل دول الخليج يا سلام صحيح مصر ام الدنيا يا ولاد هيلاقوا والنبى بلد سايبه زى كده فين احنا ناكل المسرطن وهما يكلوا المتسلطن نقوم احنا ايه ناخد على قفانا زى دلوقتى كده المحاصيل الزراعيه المتلتله فى بلادنا بنشتريها بأضعاف سعرها لا ولسه ياما هنشوف المهم خلينا فى موضوعنا قام النظام بقى اما قفش القصه ولقى اخينا بتاع الماليه دا توغل وتفحش ولم غله مش بطاله من ورا العرب قاموا ملبسينه قضيه سقع طبعاً ملهاش علاقه بالموضوع الاصلى علشان الحكومه والنظام ما يتفقسوش راحو قالوا عليه انه عمل تسهيلات لشركة السكر والقصه اياها دى اللى دخل السجن علشانها والباشا لسه خارج برائه الاسبوع اللى قبل اللى فات وعادى يعنى احنا بنتقنطر بمزاجنا فى بلادنا لكن يا حضرات المصيبه السودا ان لا يزال استمرار بيع اراضى الوادى مستمر والمصيبه الاكبر ان اللى بيوافق على بيع الاراضى دى رئيس الوزراء والريس شخصياً يعنى ما بقتشى موضوع وزارة الزراعه هى اللى مسئوله عنه زى زمان وفى الفتره الاخيره دى من 4 سنين وهى الموافقات فى التزايد حولى ربع ال8 مليون فدان اتباعوا العرب اشتروا اراضينا واخدوا خيرنا بعض اما اشتروا ضمايرنا بالفلوس امتى بقى هنفوق ونعرف اللى بيحصل فى بلدنا واحنا نايمين فى العسل نوم امتى هنفوق ونشوف خير بلدنا اللى بيتنهب عينى عينك وبيستفاد بيه العرب واحنا شعبنا جعان هنفضل وبياكل من الزباله ساكتين لغاية امتى والبلد كل يوم بتتباع حته حته قدام عيونا وبكره ييجى اليوم اللى السعودين والخلايجه يشغلونا عندهم فى بلادنا ويزلونا بلقمتنا وينفذوا خططهم ومؤامراتهم اللى بيقربوا للنجاح فى تحقيقها شويه بشويه وهى ان يرجعوا مصر وشعبها مماليك زى العصر المملوكى كده بس المره دى هنبقى مماليك ليهم ويحتلونا بقى وساعتها هيكون فات الاوان خير مصر دا وارضها الكنوز دى اولى بيها احنا المصريين مش غيرنا طول عمرنا بنزرعها وناكل من خيرها دلوقتى اليهود الاسرائيلين بيجوا يشرفوا على المشاريع وينفذوها ووزارة الزراعه ما زالت الى الان بتبعث برحلات ودورات تدريبيه ووفود من المهندسين الزراعيين والخبرا والباحثين من مصر هنا لاسرائيل رأساً علشان يزرعولهم ويتعلموا منهم نظم الزراعه الحديثه والكلام دا من واحد مسئول فى الوزاره موثوق من مصادره ودا بيحصل على فكره من ايام يوسف والى حبيبهم اللى دخلنا المبيدات المسرطنه معاهم وبيبرروا دا بأن دا شىء عادى ودا جزء من اتفاقية السلام والتطبيع بين مصر واسرائيل اليهود هما اللى بيأكلونا يا ناس بيزرعولنا واحنا ناكل واللى مسك الزراعه بعد والى قعد سنه خدله شقله مش بطاله حوالى مليار ونص ورستأ نفسه عضو فى مجلس الشعب وبعت لنا الجراد وسابها مخروبه للى جاه بعده وكله كوم والحالى دا كوم تانى وكأنه عيل تايه يا ولاد الحلال مش عارف حاجه فى اى حاجه رجع كل الحراميه والمفسدين والنصابين اللى كانوا مشيوا وجاب لنا دا بقى حاجه اشيك انفلونزا الطيور والحمى القلاعيه وجنون البقر وهروب الجديان وهبل النسوان - حقيقى هم يضحك وهم يبكى - وبكدا يا حضرات العرب خدوا خيرنا واشتروا ارضنا وشركاتنا وبكره يستعبدونا كمان خليكوا قاعدين يا مصريين لما نتباع احنا كمان بس للاسف مش هنجيب فلوس

حزينه على ما وصـل اليه حالنا

اليوم قد رأيت مأساة بكل ما تحمل هذه الكلمة من معاني تجسدت امامى حين ذهابي فى الصباح إلى عملي متخذه شارع الهرم وأقود سيارتي المتواضعة وفجأة ظهرت ورائي سيارة مسرعة سرعة رهيبة انتهزت الفرصة بأن الشارع اليوم لأول مره يملؤه السكون وكأنه السكون الحزين لما حدث فيه من كارثة ولأول مره كان خالياً تماماً من السيارات لمد البصر البعيد وفجأة ابتدأ يتفاداني لاننى أمشى بسرعة معقولة حتى أتفادى اى مفاجأة ورأيته يحاول اجتيازي بما يسمى حركة الغرز الغبية التي يفعلها شبابنا هذه الأيام وبجانبنا سيارة سرفيس فمر من بيننا وفجأة ظهرت سيده عجوزضعيفه تتأبط بشاب ليعبر بها الطريق فحاول هذا المسرع الطائش أن يتفاداهم بتخفيض السرعة وان يدير السيارة بعيدا عنهم فوقفوا مذهولين لهول الموقف وشلت حركتهم تماما ولم يتحركوا هفوة إلا أن الشاب قد تدارك فجأة خطورة الموقف وحاول أن يضع السيدة العجوز ورائه ويا ليته ما فعل ففي تلك اللحظة التي لا تحسب فمتو ثانيه والله قد صدم السيدة العجوز المسكينة صدمة قويه جعلتها تتطاير في الهواء واقسم بالله رأيتها وهى تتهاوى وتدور كالعصا حينما ندفعها في الهواء وندورها وتفرفر حتى سقطت وهوت على الأرض والفتى ينظر إليها بصدمة وبدأ يشاور لباقي السيارات القادمة المسرعة كي تقف هي الأخرى حتى لا يجهزوا هم الآخرين على تلك المسكينة فتوقفت والدموع تنهمر من عيناى وبدأت في الصراخ الهيستيرى وانا اهزى بمعنى الكلمة بكلام لا اعرف معناه حتى هذه اللحظة وللاسف من شدة هولى لهذا المشهد البشع الذى لا يفارقنى الى الان لن أستطيع أن أتابع هذا الجبان الذي هرب وفر مسرعاً بسرعة جنونية قاتله فلم نستطيع كلانا أن نأخذ رقم السيارة أو أن نحدد حتى نوعها لانشغالنا بالسيدة الثكلى وأنا للأسف بالكاد أرى الأرقام القريبة وبالذات الأرقام لما أعانى منه من ضعف نظر فما بالك رقم وبعيد لسيارة مسرعه ممكن لو كنت فكرت اعمل كده كنت انقل رقم غلط وساعتها ممكن حد تانى يتظلم والذي زاد من حزني واسفى وايقظنى على حقائق مؤلمه وبشعة ما حدث فور أن سقطت وتهاوت هذه السيدة على الأرض حين أتى شاب واضح انه لص والتقط محفظة النقود الخاصة بها ولاذ هو الآخر بالفرار فطارده الشاب المرافق للمرأه المصدومة واعتقد انه لم يستطع اللحاق به وصرخت في الواقفين حتى يتبعوا مرتكب الحادثة ومحاولة اللحاق به لان الجبان اختفى في لمح البصر وكأنه سلك شوارع جانبيه حتى يختفي بها إلى أن ينتهي الموقف خوفا من أن يكون هناك من يتتبعه أو يريد اللحاق به ولكن هيهات الكل طنش الكل أصبح وكأنه أصم لم يسمع ولم يرى وظللت أنا وسيده أخرى نستنجد بالرجال فأين الرجال ماتوا في الحرب الرجال ولن أنسى نظرة تلك السيدة طول حياتي وهى تستنجد بنا بأي شخص يأخذ بأيدها ويلقيها على الجزيرة في منتصف الشارع رافعه يداها لاعلى وكأنها ترى ملائكة الموت و حتى لا تتعرض لأذى آخر وكأنها تحتضر وحاولنا أن نعرف منها اى بيانات أو أرقام تليفونات عن بيتها فلم تجيب غير أنها تنظر إلينا في ذهول وقال الشخص الذي كان معها أنها كانت واقفة في هذا الطابور وننظر إلى هذا الطابور يا حضرات يا الهي والله لا يستطيع بشر سليم وشاب ومعافى أن يصمد أمامه فما بالك بتلك الضعيفه الطابور دا يا حضرات عند مصلحة الأحوال المدنية من منتصف شارع الهرم واقسم بالله دون مبالغه إلى آخرة أملاً من الناس البسطاء أن يستخرجوا بطاقة تموينية لعائلتهم فتباً لهذه البلد وتباً لهذا النظام وتباً لهذه المهازل عليكم اللعنه جميعا أيها البيروقراطيين المتعفنيين والمسئولين لديكم عذبكم الله كما تعذبون البشر بهذه الطريقة المهينة الغير آدمية سحقاً لكم حسبى الله ونعم الوكيل فحينما يأست هذه البائسه اليائسه من تكرار المحاولات دون جدوى قررت الذهاب إلى منزلها لعل المرة القادمة تستطيع اللحاق بشباك تقديم الطلبات وها هي سوف تموت قبل ان تحصل على حصتها التموينيه التى تذلها بها الحكومة فها هى الان ترقد على الارض لم تنصفها الحكومه ولا يرحمها البشر بل يدوسون عليها بسياراتهم ويسحقوها لمجرد انها سيده كتب عليها القدر ان تكون فقيره بسيطه ليس لديها من يدعمها ويساعدها ويقوم بدلا منها بهذا العمل الشاق ذهبت فى الصباح الباكر وفى عز البرد كى تحصل لها ولعائلتها على غذائهم المدعم ففرمتها عجلات المستهترين ابناء السفهاء ننوسين عيون اهاليهم اكيد بسلامته دى مش عربيته بالتأكيد دا واخدها من ورا ابوه وعايز يلحق يجيب لحبيبته هدية الفالنتين او مواعد صحابه يخرجوا يتفسحوا بيها النهارده . او ممكن ابوه جبهاله هديه ماذا حدث للناس الهذة الدرجه من الدنائه واللا مبالاه والتجرد من كل مشاعر الانسانيه والرحمه والرجوله والاخلاق والنخوه قد وصل حالنا لماذا لم يتحرك اى رجل ممن كانوا ينظرون فقط لمساعدة هذه المسكينه واكتفوا بأن يحملوها الى الجزيره كى تفتح لهم الطريق ويستمر سريان حركة المرور ويذهب كل منهم الى عمله وكأنها قطه او كلب مات بحادثة سياره دا حتى والله لو حد دهس كلب او قطه فى دول اوروبا تقوم الدنيا على هذه الفعله والحيوانات فى الخارج يأخذون حقوقهم اكثر من البنى آدمين عندنا أين المهللين والمشجعين والساهرين حتى الصباح حتى يستقبلوا الفريق القومى اين حماسكم الان اين حبكم الزائف لبلدكم وانتمائكم لماذا لم ولن تتعلموا الانتماء والمشاركه والاستماته فى سبيل الحق اين عدلكم الى هذا الحد من الجحود وتحجر المشاعر ينصرفون جميعاً ولسان حالهم يقول يا عم احنا مالنا هنشهد على ايه هو احنا شوفنا حاجه وافرض ماتت يقولوا فى المستشفى احنا اللى صدمناها ونخش فى سين وجيم يا عم كبر دماغك اصبحنا جبناء وقتله نعم كل من رأى هذا الحادث واستهبل فهو من المشاركين فى موت هذه السيده ان ماتت مع انى اشك انها سوف تعيش بعد هذه الصدمه وروحها البريئه الشهيده ستظل تحاصرنا جميعاً لسكوتنا عن الحق والتراجع عن الواجب وقتل ضمائرنا وتطالبنا بالثأر لها وان نأخذ حقها ممن قتلها ظلماً وافتراءا نتيجه للتسيب والفوضى والانحلال الخلقى الذى نعيش فيه وهرب بفعلته وان عاشت فتعيش كسيحه بعاهه مستديمه لا تستطيع الحراك والجبان القاتل الفاشل الندل يعيش حياته بكل بساطه وخلوا بال وكأن شيئأ لم يكن اين ضميرك ايها السفاح البائس كيف تستطيع ان تفلت بفعلتك ايها المجرم وتنام مرتاح الضمير وتظن ان لا احد يقدر ان يتوصل اليك او يراك لا ان الله يراك والويل كل الويل لك من عقابه فى الدنيا وما بالك فى الاخره والمصيبه ان شارع الهرم دا كله كماين فى كل حته وظباط مرور ليس لها حصر قرفينا طول النهار بس للاسف ولحظ هذا البائس لا يوجد ولا كمين ولا ظابط حتى يهرب بفعلته هما بيحطوا الكماين بس عند الفنادق اللى بتجيب لهم عمله صعبه من الاجانب والاسرائيلين والحفاظ عليهم ومأمورين بضرب النار على اى حد يشعروا انه ارهابى او يمس اى اجنبى آه يا بلد خيرها لغيرها والفقير فيكى بيندهس تحت عجلات ولاد الناس الجامدين قوى مش كفايه فرمتونا بالغلى والكوى والذل والقهر اللى الناس فيه كمان بتفرموهم صاحين يا ولاد... الناس . من يردع هؤلاء مجانين السرعه الذين يدهسون الكبار والاطفال والسيدات من يثأر لتلك العجوز المسكينه الفقيره الضحيه من يأخذ لها بحقها من رقبة هذا القاتل لسان حالى يقول وحتى ان كنا مسكناه كبيرها هيكون ايه فديه لاهلها علشان يتنازلوا او 6 شهور قتل خطأ او كبيرها 3 سنين مع ايقاف التنفيذ يا بلاش حياة البنى آدم ما فيش ارخص منها كم من اسر تشردت لموت عائلهم من جراء هؤلاء الفجره المسرعين المخدرين كم من اطفال اصبحوا ايتام وتحولوا لاطفال شوارع كم من مجرم هارب فى ضواحيكى يا مصر الا ولم يتسبب بقتل العديد من الضحايا الذين ليس لهم حول ولا قوه لمجرد انهم ماشين فى الشارع اين المسئولين اين الحكومه اين الرئيس ودى حاله تانيه من حالات جنون السرعه لسواقين النقل والسرفيس على الطرق السريعه كشفت احصائيه صادره عن قطاع الرعايه العلاجيه بوزارة الصحه المصريه انه ارتفع عدد ضحايا حوادث الطريق فى مصر بشكل ملحوظ وشهد عام 2007 عدداً كبيراً من الحوادث التى وقعت فى مصر على قمة قائمة حوادث الطرق فى العالم وان عدد قتلى حوادث السيارات بمصر يزيد على عدد قتلى الحروب خلال عام ، حيث تشير الاحصائيات الى ان عام 2007 شهد ما يزيد على 73 الف حادث طرق ، بلغ عدد ضحاياها من القتلى والمصابين 245 الف شخص وسجل عام 2007 رقماً قياسياً فى عدد ضحايا حوادث المرور فى مصر فطبقاً للاحصائيات احتلت حوادث الطرق فى مصر المركز الاول فى اسباب الوفيات فى الفئه العمريه ما بين 5 - 25 سنه مؤكده انه بحلول عام 2020 ستكون الحوادث المروريه السبب الثالث للوفاه على مستوى العالم وخصوصاً فى مصر . واكدت الاحصائيه ان نسبة الحوادث فى مصر سجلت ارتفاعاً ملحوظاً يساوى 25 ضعفاً من المعدلات العالميه ، بحيث اصبحت من اكثر دول العالم التى تشهد حوادث طرق منذ عام1992

وارجعت الاحصائيه اهم اسباب تفاقم مشكله الحوادث المروريه الى ان 54% من الطرق غير ممهده وان 46من الطرق تعانى من الازدحام الشديد وطالب تقرير الوزاره بضرورة ايجاد حلول عاجله وسريعه وغير تقليديه لهذه المشكله ، لوقف نزيف الطرق التى تتسبب فى خسائر سنويه على المليار جنيه" وطبعاً دا فى المشمش" اين الامن والامان فيكى يا مصر من يرحمنا ويؤمن لنا السلامه من هؤلاء القتله وعلى رأى اللى قال ان عدد ضحايا حوادث الطرق فى عصر مبارك السعيد فاق عدد الشهداء المصريين فى كل حروبنا مع العدو الصهيونى وابتسم نحن فى ازهى عصور الانجازات وسلم لى ع الكبارى .... لنا الله . ودمتم

التاج الاول فى تاريخى التدوينى

التاج دا تاج الجزيره " مين اللى جابك هنا عدو ولا حبيب " "السلطانيه" دا جزء من تمثيليه على شكل صوره غنائيه كده كانت بتيجى فى الاذاعه زمان اصل انا قديمه شويه باصيتهولى فانتازيا صديقتى



هل توافق على حذف خانة الديانة من البطاقة الشخصية ؟

يعنى انا مش عارفه ايه الفرق من وجود الديانه فى البطاقه من عدمه يعنى هو انا لو واثقه من دينى وفخوره بيه ليه ما يظهرشى فى بطاقتى سواء مسلمه او مسيحيه او يهوديه او اى ديانه تانيه على العموم الحكومه دلوقتى سمحت للى مش عايز يدلى بديانته او ديانه تانيه غير اللى نعرفهم ممكن يحط شرطه او نقطه او حتى سيمى كولومن



ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

رأى فى المثليين انهم ناس ليهم ميول جنسيه بتختلف عن الطبيعه البشريه السويه أما عن كون الإنسان يولد فيجد نفسه هكذا، فالحق لا طبعاً فتعالى الله عن أن يخلق خللاً نفسياً في أحد، ولكن دا شيء إن وجد فإنه يدل على انحراف نفسي يجب الانتباه له وعلاجه.لان الشاذ جنسياً مريض، ومرضه يبدأ نفسياً ثم يتحول إلى المرض العضوى فى بعض الاحيان وعلى ذلك فأنا لا اعترف بحقوقهم ولكن يمكن ان اتعاطف معاهم واساعدهم ان وجبت المساعده والنصيحه وليس لدى اصدقاء مثليين


هل تعتقد بوجود إضطهاد للمسيحين فى مصر ؟

انا اعتقد انه لا يوجد فى مصر اى اضطهاد للمسيحين من قبل المسلمين وان هذا الكلام لا اساس له من الصحه والعلاقات بين المسلم والمسيحى فى مصر ميت فل واربعتاشر ونبطل بقى نولع حريقه ونهدى اللعب شويه لاننا مش ناقصين بجد حد ييجى تانى يتدخل فى شئونا

من هو الشخص الذى تختارة لرئاسة مصر ؟

عمرو موسى
وذلك تيمناً بقول الفنان المرهف الحس شعبولا انا بكره اسرائيل وبحب عمرو موسى

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات؟

هجيب حسن شحاته واخليه يشكلى اعضاء الحزب من المنتخب ويبقى حزب ديمقراطى ما فيهوش كوسه فى كوره ودا حيبقى رمز الحزب اللى هيطبع على العلم فى النص بدال النسر



فى رأيك الشخصى .. ما هى أفضل مدونة على بلوجر قمت بزيارتها ؟

هما بصراحه اكتر من مدونه زى "نواره" زعيمة جبهة المهيسين ، ووائل عباس "الوعى المصرى" ومحمد " الجحيم هو الحقيقه" ومدونات فانتازيا كلها ، واحمد" الشاعر ابن هلال" ومادو 80 ، والربان ، وحلم مصر ، وايمان حبة حاجات ، ونسرين بسيونى " اسكندريه اذكرينى" ، وايجيبتيانا ترابدسول . ايجى اناتوميست ، وولاء"انا موجوده، وايمى وكوكا، والصيدلى المطحون د. عبد الرحمن



هل توافقين على الزواج من رجل مطلق ؟

بما ان الحاله السائده فى مصر هما الرجاله المطلقين والستات المطلقات فليه لأ يعنى هى جت عليه؟


اذا تزوجت وأنجبت ولدين وبنتين .. أى الأسماء تحب أن تسمى ؟

اربعه مره واحده ودول الواحد يجيب لهم صحه منين ربنا يدينا الصحه ، ماشى على العموم اسميهم ياسين و ادهم وسلمى وحنين ايوه بنتى وانا حره فيها اسميها على اسمى براحتى

هل تعتقد أن توريث الحكم فى مصر . . سيتم فعلا أم لا ؟

والله لو السياده عايزين كده يبقى حيحصل وطالما الحاله العامه للمصرين دلوقتى السكوت علامة الرضا وخلينا ماشين جنب الحيط يبقى مين بالذمه حيقدر يقول لأ كله بالكوسه يا عمرى وسلم لى ع التوريث

فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به؟



افضل انجاز هو دا له حسنات " ادعولوا ادعولوا يعمر بيت ابوه " اقتباساً من فيلم الزوجه التانيه

لا هو ممكن يكون افضل انجاز انه اكتر رئيس قدر يحقق الرقم القياسى فى انه يحكم بلد لاكثر من ربع قرن ويكتم على نفس شعبها لاقصى مده ممكنه دا المفروض يتسجل فى موسوعة جينيس للارقام القياسيه الغريبه آه وربنا

المساوىء بقى ما فيش اكتر منها وكل الناس عارفاها بس بتستعبط



أهدي هذا التاج الى اى حد عايزه انا ديمقراطيه وحزبى ديمقراطى ودينى لامسكوا انا وولادى الاربعه وابوهم اتباعاً لدولة ديكتاتور العظمى اللى ماشيه دلوقتى بس ما تخافوش هظبطكوا

رساله الى ام كلثوم فى ذكراها

النهارده الذكرى ال33 لرحيل كوكب الشرق السيده ام كلثوم ياااااااه معقول كل العمر دا غاب عننا نور وظل وشمس الكوكب اللى كنا كلنا بندور فى مداره وبنعيش بيه انا بعيش على عبق الماضى ، ورائحة الذكريات ، وجو الماضى وموسيقى والحان الماضى، فيالها من روعة لا توصف حينما كنت انتظر موعد اغانيها على اذاعتها المسماه بأسمها كل يوم الساعه الخامسه عصراً والساعه التاسعه مساءا كان ميعاد مقدس بالنسبه لى استمتع به فعلا بأم كلثوم فأسمها يحتوى على اسم "أم" لانها بالفعل ام لى وام لكل المصريين فأستمع واستعيد ذكرياتى وايامى القديمه اياً كانت سعيده ام حزينه فكل مرحله فيها اجد لها اغنيه عاشت معى من اغانيها بصوتها الرخيم الرائع واحساسها الدافىء فأنا من عشاقها وعشاق فنها الجميل ويجتاحنى احساس رهيب حينما اسمعها فأشعر وكأن كل جسمى ينتفض من شدة الاعجاب وتغمرنى مجموعه من الاحاسيس المتناقضه واشعر وكأننى اطير فى السماء وأظل ابكى وأقول الآه بحرقه حتى تنتهى من وصلتها واصبح فى غيبوبه تامه بعدها حتى افيق من شدة النشوى والروعه التى تركتنى بها وتملكتنى اثناء سماعها واجدنى اسبح فى عالم آخر غير عالمنا هذا الذى نعيش فيه .عالم آخر تملؤه الفرحة والبهجة رغم كل الالام وتملؤه ايضاً كل معانى الحب والوفاء والاخلاص التى افتقدناها الان فى حياتنا واغانينا فأين هى منا الان واين هذا الجمال الخالص فأجدنى ابكى حسره على اننى لم اعيش فى هذا الزمن الجميل واجدنى قد خسرت الكثير ، فهذه السيده العظيمة التى أثرت فى شخصيتى كل التأثير والى ابعد الحدود فكانت بمثابة المصباح الذى ينير حياتى المظلمه .ان اسمعها فأشعر بشفاء للصدر، وامن من وحده، ورفض لليأس، وطريقاً للامل فحينما اسمع صوتها وكأنه صوت الملائكه القادم من السماء حينما تشدى بأغانيها الروحانيه الدينيه رباعيات الخيام ، والثلاثيه المقدسه، والقلب يعشق كل جميل وغيرهم من الروائع النفيسه انه ليس بصوت بشر مثلنا بل صوت غريب عجيب لا يستطيع اى انسان فى العالم ان يوصفه او يشرحه فهى معجزه فذا ، وموهبه نادره ، وحدث لن يتكرر ولن يأتى الزمان بمثلها مرة أخرى فماذا كنا نكون لو لم تكون بيننا فى وقت ما ام كلثوم . رحمة الله عليها هذه السيده العظيمه التى طالما اسعدتنا ووصلت بنا الى قمة السلطنه بغناها وتعبيرها الحلو بكل لحظات حياتنا ومراحلها المختلفه علمتنا كيف نغنى للحب ونعشق ، وكيف نغنى لبلدنا ونحبها ، وكيف نتوب الى الله وندعوه . ليت الزمان يجود لنا بلحظة ويبعث الينا أحبائنا الذين افتقدناهم ولو لدقيقه واحده ونلقاهم كى نخبرهم بمدى حبنا لهم وافتخارنا بهم وتسنح لنا الفرصه لشكرهم على ما بذلوه من جهد وتعب كى يسعدونا ويمتعونا فالكلام يعجز عن التعبير ووصف الاحاسيس . ادخلك الله فسيح جناته يا ثومه ثواب ما قدمتيه لنا من فن راق محترم ورائع وسيظل اسمك مكتوب على قلوبنا بنور كلما جاء ذكراكى العطره







أسجل اعجابى من هنا بسيدة الغناء العربى كوكب الشرق ام كلثوم ليظل هذا الاعتراف والتقدير سجلاً خالداً أدون فيه حبى واعزازى لهذا الهرم الشامخ الخالد واعترف بأنه لم يطربنى ولم يشجينى غير صوتها حتى الان وسأظل اسمع ام كلثوم طالما حييت الى ان اموت. وانهى كلامى عنها بكلمات من اجمل ما غنت لنا واسعدتنا واهديها الى روحها فى ذكراها فلم اجد خير منها هديه قيمه
يا قمر ليلى ..يا ضل نهارى.. يا حبى .. يا ايامى الهنيه .. عندى لك اجمل هديه ..كلمه
كلمة الحب اللى بيها ..تملك الدنيا وما فيها.. تملك الاحلام.. كنوز الدنيا ديه.. قولها ليه
قولها.. للطير.. للشجر.. للناس .. لكل الدنيا ..قول الحب نعمه مش خطيه
الله محبه . الخير محبه . النور محبه