Sunday, February 3, 2008

رساله الى ام كلثوم فى ذكراها


النهارده الذكرى ال33 لرحيل كوكب الشرق السيده ام كلثوم ياااااااه معقول كل العمر دا غاب عننا نور وظل وشمس الكوكب اللى كنا كلنا بندور فى مداره وبنعيش بيه انا بعيش على عبق الماضى ، ورائحة الذكريات ، وجو الماضى وموسيقى والحان الماضى، فيالها من روعة لا توصف حينما كنت انتظر موعد اغانيها على اذاعتها المسماه بأسمها كل يوم الساعه الخامسه عصراً والساعه التاسعه مساءا كان ميعاد مقدس بالنسبه لى استمتع به فعلا بأم كلثوم فأسمها يحتوى على اسم "أم" لانها بالفعل ام لى وام لكل المصريين فأستمع واستعيد ذكرياتى وايامى القديمه اياً كانت سعيده ام حزينه فكل مرحله فيها اجد لها اغنيه عاشت معى من اغانيها بصوتها الرخيم الرائع واحساسها الدافىء فأنا من عشاقها وعشاق فنها الجميل ويجتاحنى احساس رهيب حينما اسمعها فأشعر وكأن كل جسمى ينتفض من شدة الاعجاب وتغمرنى مجموعه من الاحاسيس المتناقضه واشعر وكأننى اطير فى السماء وأظل ابكى وأقول الآه بحرقه حتى تنتهى من وصلتها واصبح فى غيبوبه تامه بعدها حتى افيق من شدة النشوى والروعه التى تركتنى بها وتملكتنى اثناء سماعها واجدنى اسبح فى عالم آخر غير عالمنا هذا الذى نعيش فيه .عالم آخر تملؤه الفرحة والبهجة رغم كل الالام وتملؤه ايضاً كل معانى الحب والوفاء والاخلاص التى افتقدناها الان فى حياتنا واغانينا فأين هى منا الان واين هذا الجمال الخالص فأجدنى ابكى حسره على اننى لم اعيش فى هذا الزمن الجميل واجدنى قد خسرت الكثير ، فهذه السيده العظيمة التى أثرت فى شخصيتى كل التأثير والى ابعد الحدود فكانت بمثابة المصباح الذى ينير حياتى المظلمه .ان اسمعها فأشعر بشفاء للصدر، وامن من وحده، ورفض لليأس، وطريقاً للامل فحينما اسمع صوتها وكأنه صوت الملائكه القادم من السماء حينما تشدى بأغانيها الروحانيه الدينيه رباعيات الخيام ، والثلاثيه المقدسه، والقلب يعشق كل جميل وغيرهم من الروائع النفيسه انه ليس بصوت بشر مثلنا بل صوت غريب عجيب لا يستطيع اى انسان فى العالم ان يوصفه او يشرحه فهى معجزه فذا ، وموهبه نادره ، وحدث لن يتكرر ولن يأتى الزمان بمثلها مرة أخرى فماذا كنا نكون لو لم تكون بيننا فى وقت ما ام كلثوم . رحمة الله عليها هذه السيده العظيمه التى طالما اسعدتنا ووصلت بنا الى قمة السلطنه بغناها وتعبيرها الحلو بكل لحظات حياتنا ومراحلها المختلفه علمتنا كيف نغنى للحب ونعشق ، وكيف نغنى لبلدنا ونحبها ، وكيف نتوب الى الله وندعوه . ليت الزمان يجود لنا بلحظة ويبعث الينا أحبائنا الذين افتقدناهم ولو لدقيقه واحده ونلقاهم كى نخبرهم بمدى حبنا لهم وافتخارنا بهم وتسنح لنا الفرصه لشكرهم على ما بذلوه من جهد وتعب كى يسعدونا ويمتعونا فالكلام يعجز عن التعبير ووصف الاحاسيس . ادخلك الله فسيح جناته يا ثومه ثواب ما قدمتيه لنا من فن راق محترم ورائع وسيظل اسمك مكتوب على قلوبنا بنور كلما جاء ذكراكى العطره







أسجل اعجابى من هنا بسيدة الغناء العربى كوكب الشرق ام كلثوم ليظل هذا الاعتراف والتقدير سجلاً خالداً أدون فيه حبى واعزازى لهذا الهرم الشامخ الخالد واعترف بأنه لم يطربنى ولم يشجينى غير صوتها حتى الان وسأظل اسمع ام كلثوم طالما حييت الى ان اموت. وانهى
كلامى عنها بكلمات من اجمل ما غنت لنا واسعدتنا واهديها الى روحها فى ذكراها فلم اجد خير منها هديه قيمه
يا قمر ليلى ..يا ضل نهارى.. يا حبى .. يا ايامى الهنيه .. عندى لك اجمل هديه ..كلمه
كلمة الحب اللى بيها ..تملك الدنيا وما فيها.. تملك الاحلام.. كنوز الدنيا ديه.. قولها ليه
قولها.. للطير.. للشجر.. للناس .. لكل الدنيا ..قول الحب نعمه مش خطيه
الله محبه . الخير محبه . النور محبه

9 comments:

mado80 said...

حنين
ازيك

بجد يا حنين الله علي زوئك واحساسك الجميل
تعرفي أنا من عشاق أم كلثوم من دراويش هذه السيده العظيمه التي أعتبرها صوت مصر هي بالفعل صوت مصر في أعتقادي أنه لن يجئ أحدا مهما كان صوته بمثل قامه هذه السيده

عاوز أقلك علي حاجه تعرفي أنا قبل ما أقرأ هذا البوست ومن محاسن الصدف كنت أستمع الي قصيده الأطلال هذه القصيده التي أذوب فيها عشقا تتملكني حينما أسمع هذه القصيده أحاسيس كتلك الأحاسيس التي ذكرتيها بالظبط أشعر اني أطير وأحلق في السماء عاليا
خصوصا عندما تصل الي المقطع الأخير من الأغنيه

يا حبيبي كل شئ بقضاء ما بأيدينا خلقنا تعساء ربما تجمعنا أقدارنا ذات يوم بعدما عز اللقاء فأذا أنكر خل خله وتلاقينا لقاء الغرباء ومضي كل الي غايته لا تقل شئنا فأن الحظ شاء

بجد بحييكي يا حنين علي الموضوع ده وعلي تذكيرك لنا بذكري هذه السيده الغاليه علي قلوبنا...رحمها الله رحمه واسعه

ألف تحيه لكي ياحنين وألف تقدير لشخصك الكريم

Hypatia said...

الله الله يا حنين

الله الله يا عم مادو يا رومانسي انت
:)

انا مش فى مود رومانسي خالص من زمان وكمان انا مش من دراويش ام كلثوم اختلف معاها انسانيا كثيرا لكن طبعا ده ميمنعش انى باعشقلها اغانى كتير اكتر اغنيه بحبها لام كلثوم هى فكرونى

الجزء اللى انت كتبته من الاطلال حلو اوى يا مادو وجعللى قلبي اكتر ما هو موجوع

الله يرحمها ويرحمنا

Hoda said...

مادو

ازيك يا مادو اشكرك يا مادو على احساسك الجميل وكلامك الاحلى وسعيده اننا متفقين على حب السيده العظيمه ام كلثوم لانها تستحق كل اعجاب وحب وتقدير وفعلا قصيدة الاطلال من اروع ما غنت وتخيل انها اختيرت من افضل 100 اغنيه للالفيه اللى فاتت على مستوى العالم وخصوصاً فعلا المقطع اللى ذكرته دا بيأثر فى جداً اشكرك جداً على اهتمامك ومرورك الكريم ودائماً بيسعدنى تشريفك ومشاركتك معانا

خالص تحياتى وتقديرى

Hoda said...

نسرين

ازيك يا جميل انا عارفه انتى بتحبى فيروز طبعاً وحطالها صوره اد كده فى مدونتك انا كمان بمووت فى صوت وشخص وهيبة فيروز وبعشق اغانيها حقيقى وفيروز فى العالم العربى اعتقد انها لا تقل اهميه عن ام كلثوم فى الموهبه والصوت الجميل بس انا كان عندى ليكى سؤال يا نسرين انتى ليه بتقولى ان انتى بتختلفى معاها انسانياً انا عن معرفتى وقرائتى عن ام كلثوم كل تاريحها مشرف ومحترم وبالذات انسانياً لا احد ينكر مجهوداتها علشان المجهود الحربى ومصر كفايه انها ماتت ما حيلتهاش حاجه والست جيهان السادات حسرتها قبل اما تموت واخدت منها مشروعها الخيرى الوحيد وحتى اللقب كمان يعنى فيه اكتر من كده ظلم ان واحده فى عظمة ام كلثوم تموت محسوره وحزينه على نفسها يا ريت يا نسرين تقوليلى ايه وجهة نظرك فى الموضوع دا بجد يهمنى

سلام يا شرز

walaa said...

حنين ازيك عامله ايه
بجد ام كلثوم كما قيل عنها الهرم الرابع للمصر
هى انسانه لن تتكرر مره اخرى
تحياتى ولاء

Hoda said...

عزيزتى ولاء

شرفتينى بزيارتك وسعيده قوى ان موضوع ام كلثوم دا عجبك وانك بتشركينى فى اعجابك بأم كلثوم هى فعلا رمز من رموز مصر رحمها الله وبتمنى تنورينى دايما دايماً بسعد بزيارتك

خالص تحياتىً

Fantasia said...

الله عليكي يا حنين, بجد بوست جميل وجاي في وقت جميل

نفسي نحتفي بالعظماء بتوعنا.. بلدنا غنية بثروتها البشرية
وهي دي ميزة مصر الحقيقية
الانسان المصرية, الانسانة الانسانة المصرية.. بموهبتهم وابداعهم واخلاصهم واصالتهم ومعدنهم واحساسهم الراقي

انا على فكرة من القلائل اللي بيعجبوا باحساس ام كلثوم اكتر من صوتها.. يعني أنا شايفة ان موهبتها الحقيقية كانت في تنوع الاداء الصوتي وازاي كانت بتعلى باحساس الجملة كل مرة تعيدها

يعني الاطلال, رائعة ابراهيم ناجي, مش ممكن حد كان يقدر يغنيها غير ام كلثوم.. الموضوع ف الاخر مش صوت وبس.. لأ دا الانفعال بالكلمة واستحضار الاحساس و نقله للي بيسمعه

يعني مع كل احترامي لنجاة الصغيرة, واختياراتها الهايلة ف اغانيها, وصوتها الجميل.. لكن سوري احساسها ميت.. مش بتعيشني ف جو الاغنية.. مش بنفعل معاها.. على طول نايمة.. يمكن عشان كدة اغانيها الرومانسية السهتانة أوي نجحن نجاح عظيم

لكن قصيدة لا تكذبي بتاعة مأمون الشناوي بجد شلفطت أمها.. واصلا فيلم الشموع السوداء دا كله بيجيبلي مغص.. يعني مالاقوش غير الفيلم دا يحطوا الاغنية فيه؟

انما ثومة ف الاطلال.. يا لهوي يانا يا لهوي.. شموخ ايه وقوة ايه وتمرد ايه وثورة ايه.. حاجة تانية.. تنقلك مليون احساس مع بعض.. القوة والضعف, الشموخ والانكسار, الحب والكره, الانفعال والحنية.. مين غير ام كلثوم كان يقدر ينصف القصيدة دي؟ مين كان يقدر ينقل روح المرأة المقهورة المظلومة اللي في عز تمردها وثورتها بتفضل برضه ضحية؟

هي دي العبقرية. ام كلثوم لا كانت بتغني بجسمها ولا بلبسها.. كانت ست بجد.. الست.. الست الفنانة الجادة المحترمة القوية كما يجب ان تكون

شكرا يا حنين على البوست الحلو ده.. رحم الله ام كلثوم وكل العظماء الذين اثروا حضارة بلدنا بعملهم وروحهم الجميلة.. ولا انسى ان اترحم على رحيل الاستاذان رجاء النقاش ومجدي مهنا في يوم واحد.. رحلا وهما يؤديان الرسالة حتى اخر لحظة, لتبقى مصر عزيزة بامر الله

خالص تحياتي

Fantasia said...

يا نسرين

شاكلك واخدة موقف من ام كلثوم عشان كانت بتغني للملك وبعدين ساندت الثورة.. ولا ايه؟
بس هي كانت ست ذكية يعني, وأي حد مكانها كان هيعمل كدة

ع العموم مش عايزة اسبق الاحداث
ممكن يكون عندك اسباب تانية
انا مش من دراويش ام كلثوم برضه مع اني بحب اغانيها جدا.. لكن مقدرش احط شريط ليها واقعد اسمعه
لازم اسمعها ع القهوة

انا الصراحة بقدر فيها ذكائها وطموحها وحتى نرجسيتها لانها خلتها تفضل ع القمة. دا غير انها كانت من الستات النادرة ف مصر اللي اشترطت ف جوازها ان العصمة تكون ف ايدها. وانا احترم الستات الواعية دي موت

Hoda said...

الغاليه فانتا

الله عليكى انتى بجد وعلى كلامك الجميل دا انا ما قريتشى فى حياتى وصف ادق ولا احسن من كده اتقال عن ثومه بجد ابدعتى التعبير واسكتى حسى لا اجد كلمات ارد بيها على وصفك وجمالك وعبقريتك فى الوصف حقيقى استاذه هو ليا ملاحظة واحده ان احنا ما نقدرشى ننكر فضل وعبقرية الفنان الكبير قوى رياض السنباطى والحانه الهايله اللى لحنها لام كلثوم وخصوصاً الاطلال يعنى اللحن عليه عامل كبير جداً طبعاً وبرضه متهيألى محدش ابدا كان يعرف يلحن القصيده دى زى رياض بجد الله يرحمهم جميعاً بس يا فانتا نجاة جميله برضه ورقيقه كده هى صحيح صوتها بينيم شويه بس لا برضه ما تقوليش بقى اغانى الفيلم دا بالذات روعه بموت فيها بجد بس وانا صغيره كنت بخاف من الفيلم دا مش عارفه ليه كنت بحس ان تصويره واللوكيشن بتاعه كده مقبض وغبى شويه بس اغانى نجاة اللى لحنها عبد الوهاب كلها تحفه بصراحه انا فعلا حزنت جداً على رجاء النقاش بالذات لانى كنت بحب كتابات الراجل دا قوى بس هنعمل ايه دا حال الدنيا كل الناس الجميله بتختفى من عالمنا وعلى رأى المثل الشعبى ما بيقعد الا شر البقر والحدق يفهم ... نورتينى واسعدتينى وشرفتينى يا فوفا ويارب ما يحرمنيش من تعليقاتك ولمساتك الساحره دى اللى بتزيد مدونتى جمال وروعه حقيقى

خالص تحياتى ومودتى