شوية تساؤلات على استنتاجات على حبشتكانات

أعتقد ان الحل لفض النزاع وايقاف الحرب على فلسطين من قبل الصهاينه فى ايد امريكا وهى بس القادره على انهاء هذا العدوان من الجانبين ولكن ما نراه الان هو ان امريكا مطنشه على الاخر ومصدره العبيطه ومستفيده اكبر استفاده من وقت الحرب دا بالذات فى ظل الازمه العالميه الماليه والاقتصاديه الحاليه اللى مبهدلاها وطبعاً معنى حرب يعنى سعر النفط بيعلى وايضاً اسعار الصرف وهى تتمنى الان ان تستمر الحرب الى ما لا نهايه حتى تتحسن اوضاعها شويه وتعلل عدم تفاعلها مع الموقف الراهن بأنها فى فترة رئاسه انتقاليه ولا يسعها فعل شىء مؤثر فى تلك الفتره ضاربه بما يحدث فى العالم العربى عرض الحائط وكأن لسان حال بوش بيقول خليهم يقضوا عليهم ويبيدوهم العرب الرعاع اللى ضربونى بالجزمه بعد كل خدماتى ليهم " دا من وجهة نظره طبعاً" اما من وجهة نظرى انا بقى فبقول ليه لأ ما يمكن جزمة منتظر كانت هى السبب فى اللى بيحصل دا ولسه هيحصل يعنى فردة جزمه عملت أزمه من غير لازمه .. بس اكيد كان ليها لازمه دا يستاهل الف جزمه

وبتعجب من رد فعل العالم العربى كله ضد مصر والتحامل اللا مبرر والمبالغ فيه ، طيب يشوفوا مين اللى بادر بعمل مشروع لوقف اطلاق النار من الجانبين او هدنه للقتال بفعل مش مجرد كلام وعنجهيه وخلى مجلس الامن يصدر قرار بالسرعه دى نتيجه مباحاثات و جهود عديده ،هى صحيح مصر فقدت كتير فى الفتره الاخيره من دورها الفعال وتأثيرها فى العديد من القضايا العربيه وانشغلت بشؤنها السياسيه الداخلية بس كان ليها دايماً مواقف مشرفه وتقريباً كانت البلد الوحيده اللى كانت ليها مبادرات للسلام والدفاع عن القضيه الفلسطينيه والبلد العربيه الوحيده اللى حربت حرب نزيهه وانتصرت بشرف وضحت بخيرة شبابها فى سبيل رفعتنا وكرامتنا ، مش مصر برضه ولا كوالا لامبور. ما ييفتكروش لينا اى حاجه كويسه عملناها ، ما بيفتكروش الا السىء بس . وانتوا عملتوا ايه يااللى بتتهمونا بالعماله والخيانه غير التسويس والتسخين والتوقيع زى الست الموقعتيه اللى مالهاش شغله ولا مشغله طول النهار الا المصمصه ونقل الكلام والشتيمه يا ميت خيبه علينا احنا العرب عمرنا ما هنعلى ابداً طول ما احنا كده مع بعض.

وحزينه كل الحزن على مدى الانقسام والتفرقه اللى توصل ليها العرب وكمية الحقد والكراهيه اللى بينا وبين بعض ، هو مين اللى المفروض عدونا كلنا ومين اللى يستحق كرهنا والتصدى له مش اسرائيل برضه ولا انا غلطانه ، ليه ما بنتعلمشى من اخطائنا ونعرف عدونا من حبيبنا ؟ ليه احنا مش زى الغرب لو بصينا للغرب نلاقى كله عباره عن اتحادات مع بعض كلهم وعلشان كده هما اقوياء وكلمتهم مسموعه ، وبنلاقيهم حتى لما بيختلفوا مع بعض بيختلفوا بتحضر وفى خصوصيه بينهم مش بينشروا غسيلهم الوسخ كده بالمفتشر ادام مخاليق ربنا ويشمتوا العدو فينا ، الواقع للاسف شىء مؤلم ومؤسف وغير مبشر بخير ابداً وللاسف دى بدايه لانقسام هيؤدى بينا جميعاً لكارثه مؤكده ممكن تكون نتائجها ابادة العرب جميعاً ومش من حد غريب لا هما اللى هيخلصوا على بعض من جواهم وهيقعوا فى الفخ وينفذوا المخطط اللى مرسوم لهم بكل سذاجه وغباء ، ما اراه يفطر القلب اما بلاقى على كل المنتديات والمدونات عرب ومصريين ماسكين فى بعض وفرشين الملايه وهاتك يا ردح بالذمه دا مش عيب علينا .. ليه بنتفرق .. ليه بنكره بعض .. ليه بنتقسم أشى مسلم ومسيحى ، وشيعى وسنى ، وحمساوى وفتحاوى وحزباوى وهبلاوى .. ليه دا كله .. نفكر كده شويه ونشوف ايه اللى استفدناه من ساعة ما اتحزبنا كده ضد بعض غير الخساره فى كل حاجه واولها عروبتنا اللى بقينا نشكك فيها دلوقتى ، والاف الابرياء اللى مالهومش اى ذنب وراحوا نتيجة انانيتنا ....وسوادنا

وأخيراً لا مفر ولا نجاه الا بتوحيد صفوفنا من تانى ، وتوحيد كلمتنا .. صدقونى هو دا الحل للخروج من على حافة الهاويه اللى رايحين ليها برجلينا بكل ثبات وثقه ومش عارفين ايه اللى مستنينا عندها ، أدعوا الله ان يوحد المسلمين والعرب جميعاً لرفعة هذه الامه مرة أخرى

!!!! لأنكم كنتم خير أمة اخرجت للناس