اشتريت اليوم وروداً

اشتريت النهارده زهور... ورد احمر اللى انتى كنتى بتحبيه . دورت عليكى فى كل مكان بس للاسف مالقيتكيش !!! صحيت على الحقيقه اللى لغاية النهارده مش عايزه اتقبلها وهى ان انتى سيبتينا هنا فى عالمنا القاسى دا وروحتى لدارك الحق مكانك الجميل اللى لو خيروكى عنه بكنوز الدنيا كلها عمرك ما ترجعى للدنيا بتاعتنا دى تانى لأنك اكيد فى مكان احسن بكتير من اللى احنا عايشين فيه دلوقتى عوضاً ليكى عن كل اللى عانيتيه وشوفتيه فى حياتك من شقى ومعاناه ومرض . فراقك صعب قوى عليا حاسه كأنى أتاخد حته من قلبى معاكى. كل يوم بحس يا أمى أن عمرى ما كان لى صاحب فى الدنيا دى غيرك انتى كنتى صاحبتى الوحيده كنا بنسكن روح بعض دلوقتى روحى راحت منى ، انا عايشه جسد من غير روح من بعدك ، ما كنتش بتكلم مع حد غيرك ولا احكى لحد اوجاعى ومشاكلى وافضفضله زيك انتى يا أمى . أد ايه وحشانى قوى وحشانى نصايحك وحشنى حضنك وحنانك ومساندتك وتشجيعك وحبك لى وتدليلك وطبطبتك . انتى اللى كنتى بتصبرينى على قسوة الحياة وظلم البشر ، محتاجه دعاكى قوى دلوقتى بالذات ، حاسه انى فاضيه من جوايا ، هشه ، ما ليش اى وجود من غيرك كان لى وجود معاكى وبيكى ، لكن من بعدك تلاشيت ، اتهديت ، بشعر دايماً بالبرد والخواء وجودك جنبى كان بيطمنى ويخلينى واثقه من نفسى وواثقه ان ورايا ضهر بتسند عليه واعتمد عليه هو انتى يا أمى. ساعات بحس انك حاسه بيا وروحك عايشه معايا ساعات والله بكلمك وادردش معاكى زى ما كنا بنعمل زمان وبحس انك بتردى على وشيفانى وبتفرحى لفرحى وتزعلى لزعلى وساعات بحس انك بتدعيلى من المكان الجميل اللى انتى فيه كل ثانيه بتمر فى حياتى ببعتلك الرحمه واقولك بحبك يا امى يا ترى بتسمعيها وبتردى على . طيب لما بقولك سامحينى يا امى بتقوليلى مسامحاكى يا بنتى نفسى اعرف بجد

بستغرب وبحزن جداً النهارده لما بلاقى الولاد والبنات بقوا بالقسوه وبالجليطه دى مع امهاتهم اللى ساعات بتوصل لحد الاهانه والضرب فى بعض الاحيان !! واقول معقوله للدرجه دى وصلنا للجحود ونكران الجميل والعقوق اللى احنا فيه دا ؟ للاسف هما مش مقدرين قيمة الكنز اللى معاهم ما بيحسش بقيمة الام الا اللى اتحرم منها وبيفقدها فعلاً . مفيش بعد الام والله صدقونى . الام دى اعظم نعمه ربنا انعم علينا بيها مهما عملنلها والله عمرنا ما هنقدرها حق قدرها ولا نعوضها اللى صبرته وتحملته علشنا. تصدقوا بشوف بعينى اللى يدخل امه بيت المسنين علشان مراته مش طيقاها ، واللى يطرد امه من الشقه علشان يتجوز فيها . عار علينا والله اللى بيحصل دا لامهاتنا عمرهم ما يستحقوا مننا كل الجحود دا ابداً دا عقوق الوالدين يا كرام من أكبر الكبائر ... دا بدال ما نكرمهم ونشيلهم جوا عينينا لما يكبروا ويحتاجولنا امال امتى هنريحهم ونرد الجميل ؟ فين الرحمه ، فين الانسانيه ، ان ما كناش نقدر امهاتنا ونبوس ايديهم ورجليهم على تعابهم علشانا ، لو ما يكونشى لينا خير فى امهاتنا هيكون لينا خير فى مين ؟ دا فى ناس بتدعى على ابهاتها وامهاتها انهم يموتوا علشان يورثوهم حد شاف كده يا ناس ؟ بالله عليكم مين بيحبنا اكتر من امنا مين عايز مصلحتنا ونجاحنا قدها ، مين بيضحى بسعادته وراحته وصحته علشان يسعدنا ويخلينا بنى آدمين محترمين وتتمنى انك تبقى احسن منها كمان ،مين بيقف جنبنا فى حزننا ومرضنا ومشاكلنا غير امنا مين بيفنى عمره علشانا ويفضل فى عطاء مستمر طول العمرو من غير حدود ولا ينتظر مقابل عليه غيرها . ليه بعدنا قوى كده عن اخلاقنا وموتنا ضمايرنا حتى لاقرب الناس لينا ، ليه نسينا دينا وان ربنا وصانا بالام ورسوله الكريم . يبقى فاضل ايه تانى يخلينا نبر امهاتنا ونحسسهم بحبنا واهتمامنا وبأننا شيلين جمايلهم علينا وعطائهم فوق راسنا ونحاول نسعدهم ولو حتى يوم واحد فى السنه هو اليوم دا . رحم الله مصطفى امين اللى عمل اليوم الجميل دا عشان يفكر الناس ويصحيهم من غفلتهم ويذكرهم انهم يهتموا شويه بأمهم . كنت زمان وامى عايشه احزن قوى على الناس اللى فقدوا امهاتهم واقول يا عينى عليهم اكيد اليوم دا بيبقى حزين عليهم قوى ، لكن دلوقتى حسيت بأهميته بالرغم من قسوته والاهميه دى للطرفين للى امه عايشه واللى امه متوفيه الاتنين بيفتكروا امهاتهم دا لو كانوا نسيوهم اساساً . اوصيكم بأمهاتكم بروا امهاتكم قبل ما ييجى اليوم ونندم على الفرصه دى اللى قدمنا دلوقتى ونندم بعد كده ان احنا فى يوم من الايام عاملنا امهاتنا بالشكل المبتزل دا وساعتها مش هيفيد الندم وهيبقى احساس فظيع بالحسره والندم عمر ما حد يقدر يستحملوا
انا يا امى هجيب الورد وآجى أزورك زى كل سنه يا ريت يعجبك وتقبليه منى . وهقرا لك الفاتحه انتى وكل الامهات . سامحينى يا أمى لوكنت يوم اغضبتك او زعلتك منى . عندى مشاعر متزاحمه مش عارفه أحزن لفراقك النهارده ولا احسدك على مكانك الهادى الجميل، بس هنتقابل تانى ، مفيش حد عوضنى عنك ابداً ولا ملى الفراغ اللى سيبتيه. والاقينى بردد كلام قالوا قائل قديماً فى فقد احباؤه
فى ثنايا القلب أنتم لم تزالوا * غير انا صابرون
هيهات أن ننسى وان طال المدى * غير انا صابرون

اللى بيخفف عنى مرارة الفراق انك شهيده بمعنى الكلمه فى جنة الخلد يا امى ومش هلاقى احلى من كلام ربنا فى كتابه العزيز

" سلام عليكم بما صبرتم فنعم عقبى الدار"