!!!مجلس "سيد قراره" تحالف مع الحكومه للقضاء على شعب مصر

مش قادره احدد الحكومه عايزه ايه من الشعب المسالم الطيب ؟؟ وعايزه توصل لايه انها تدمر مصر اكثر من كده !! يعنى ايه علشان الساده الافاضل يخلصوا ويروحوا يستجموا بقى فى منتجعاتهم ويقضوا الاجازه بتاعتهم يقوم المجلس دافع عشر قوانين دفعه واحده للموافقه عليهم فى اسبوع واحد طبعاً علشان يلحقوا قبل انتهاء الدوره البرلمانيه الحاليه وياللا هوبا سلق بيض والسلام .. وموافقه.. اعتماداً طبعاً على الاغلبيه من الحزب الوطنى اللى بتحتل المجلس وبتسيطر عليه وبتمثل فى نفس ذات الوقت الحكومه اللى هرايانا قوانين بقالها اسبوعين وكالعاده فى ظرف اسبوع يكون كل شىء ميت فل واربعتاشر. يعنى ازاى قوانين مهمه ومحتاجه لبحث ودراسه ومناقشات زى قانون الطفل وغسيل الاموال وحماية المنافسه الاحتكاريه اللى اتحسم طبعاً لصالح الباشا الكبير الذى لا يقهر احمد عز وطلع للبلد كلها لسانه وقالهم اعلى ما فى خيلكم اركبوه..، وانشاء اربع محاكم جديده فى حلوان و6 اكتوبر والبحر الاحمر، وقانون الاحزاب السياسيه ، والغاء نظام فرض الحراسه ، وتأمين سلامة الشعب ، والغاء قانون حماية القيم من العيب اى الغاء نظام المدعى الاشتراكى ، وثلاثة قوانين خاصه برجال القضاء ومد سن الاحاله للمعاش .. يعنى بالله عليكم ازاى قوانين مهمه زى السابق ذكرها دى تتكروت بالطريقه دى ؟ ايه اللى بيحصل فيكى دا يا مصر الناس دى عايزه توصلنا لايه بالظبط !! والدكتور سرور بيقول ان المجلس غير مسئول والمسئول هو الحكومه !! يعنى كله بيرمى المسئوليه على التانى وبقت هيصه والواحد ما بقاش عارف مين المسئول عن المهازل اللى بتحصل دى والشعب واقف يتفرج لا حيلة له ولا قوه ورئيس الجمهوريه بيحمل الحكومه مسئولية كل شىء يعنى هى خلاص الحكومه اعتبرت الشعب دا من ممتلكاتها الخاصه ورثوه عن اهلهم يعملوا فينا اللى عايزينه من غير ما ياخدوا رأينا فى حاجه واحنا ندفع ونقول سمعاً وطاعه ، دا ولا حكم قراقوش .. وطبعاً بكده انتصر شيخ منصر "وزارة الجبايه" وزارة الماليه سابقاً لما انتزع موافقة المجلس على قانون الجبايه الجديد بتحصيل ضريبه من كل المصريين حتى اللى مش لاقيين ياكلوا فيها و فرض جبايه جديده على جميع العاملين فى الدوله واصدر قرار مفاجىء دون سابق انذار ولا سمعنا عنه فى اى حته منذ ايام برفع الحد الاقصى للاجر المتغير الخاضع للتأمينات من 6 آلاف جنيه سنوياً الى 7500 جنيه مما ترتب عليه رفع الحد الاقصى الخاضع للتأمينات من الاجر المتغير من 500 جنيه شهرياً الى 600 جنيه شهرياً يعنى لسه مش مكفيه اللى لموا لا ما زال يستغل العلاوه اللى استردتها الحكومه اضعافاً مضاعفه . فاضل ايه تانى ياخدوه من مرتباتنا ما يلغوها احسن والله والا يخدوها كلها ويدونا كوبونات صرف ، مش عارفين يعملوا فينا ايه يولعوا فينا، والباشا وزير العدل اللى اخدله هو كمان شقله من القوانين اللى بتديلوا صلاحية السيطره على القضاء ووزارة العدل .. وياللا ياللا يا جدعان .. قبل ما يعقل يا جدعان .. وكل واحد يفصل له قانون على مقاسه ويتوافقله عليه فى عزبة ابوهم اللى مش عارفين يقسموها ازاى !!! والمعلم الكبير بقى رئيس العصابه اللى كان له دايماً نصيب الاسد " وزارة البلطجه" الداخليه سابقاً اللى عدى قانون المرور طبعاً لاعادة الهيبه لرجال المرور والسيطره على الزحام وزيادة حصيلة الاتاوات والتهليبات قصدى الغرامات وطبعاً كالعاده كان الخسران الوحيد فى السيرك دا كله هو الشعب المصرى اللى بيصرخ ويقول يا ناس الحقونا واللى اكتوى بنار الاسعار وزيادة الضرائب وما بقاش حيلته غير انه يفكر ازاى يجيب رغيف عيش يسد رمقه ورمق اسرته ايه الاوضاع المعكوسه دى ازاى وصلنا للدرجه دى واصبح كبرى المهازل والمصائب بترتكب تحت قبة مكان بيعتبر انه صوت الشعب ورأى الشعب، وكل يوم تحدث حوادث فى مصر يشيب لها الولدان لا ولسه اللى جاى ، ومن بشاعتها ممكن تهز دول وتقيل انظمتها بالكامل اصبحت احداث عاديه يوميه فرديه وتمر من بيننا مرور الكرام . اصبح فى مصر المفسدين فوق القانون ، وفوق الدوله وهم اولى الامر ، احتكروا السياسه وكل شىء فى البلد حتى ضاع القانون وتفشى الفساد والمفسدين ، مين هينقذ الوطن دا ويساعده ويخلصنا من شلة الحراميه دول ، امتى مصر والمصريين يتحرروا من الغمه اللى احنا فيها دى ، وترجع مصر لمجدها وتعود ليكى يا مصر شمسك الذهب